અનાથોની માતાનો મેળો – ખંભોળજ
રોમન કેથોલિક સંપ્રદાયનો આ એક ધાર્મિક મેળો છે , જે અનાથોની માતાના મેળાના નામે ઓળખાય છે . આણંદ જિલ્લાના ખંભોળજ ગામે આ મેળો લગભગ છેલ્લાં સિત્તોતેર વર્ષથી ભરાય છે . ઈસુને બાળકો ખૂબ જ પ્રિય હતાં . તેઓ એમ કહેતા કે , બાળકોને મારી પાસે આવવા દો , કેમકે સ્વર્ગનું રાજન તેઓનું છે . ઈસુની માતાનું નામ મિરયમ હતું , જે અનાથોની માતા તરીકે ખંભોળજ મુકામ સ્થાપિત છે . દર વરસે દિવાળીના દિવસે આ મેળો ભરાય છે . તે દિવસે દેવળને શણગારવામાં આવે છે તેમજ બહારથી આવતા ભક્તજનો માટે વિશાળ મંડપ બાંધવામાં આવે છે . મેળામાં ધાર્મિક ક્રિયાને વધુ મહત્ત્વ આપવામાં આવે છે . મેળાના સમય દરમ્યાન ચર્ચમાં વિધિ થાય છે , જેને માસ કહેવામાં આવે છે . ધર્મના વડા કે ધર્મગુરુઓ ચર્ચમાં ધાર્મિક વિધિ કરે છે . ભક્તજનોથી દેવળ ઊભરાય છે . આબાલવૃદ્ધ અને બાળકો પણ તેમાં સામેલ હોય છે . પ્રાર્થનાવિધિ વખતે ધર્મગુરુ ઉપદેશ આવે છે , જેને ભક્તજનો શાંતિથી સાંભળે છે , ખ્રિસ્તપ્રસાદ લે છે , અને યથાશક્તિ દાન કરે છે . ગામ ગામના લોકો નાતજાતના ભેદ સિવાય આવે છે અને માતાના આશીર્વાદ મેળવે છે . ઘણા શ્રદ્ધાળુઓ પગપાળા પણ આવે છે . કેટલાક પોતાનાં વાહનોમાં પણ આવે છે . આ રીતે ખૂબ જ ભક્તિભાવથી અને અનાથોની માતાનાં દર્શન તેમજ પોતાની માનતા પૂરી કરવા ભક્તજનો ઊમટી પડે છે . આ એક ધાર્મિક મેળો છે , જ્યાં શિસ્ત , ધાર્મિક મૂલ્યો અને શાંતિનો અનુભવ થાય છે . ખંભોળજની આસપાસનો નાનો - મોટો ગ્રામ્ય વિસ્તાર ઉપરાંત શહેરો નિડયાદ , આણંદ , વડોદરા , ભરૂચ , સુરત , જામનગર , રાજકોટ , પોરબંદરથી કેથોલિક જનો ઉપરાંત બિનખ્રિસ્તી જનોની વિશાળ હારમાળા પોતાનાં શ્રદ્ધા અને વિશ્વાસના બળે ઊમટી પડે છે અને જીવનમાં દુઃખો , મુશ્કેલીઓ , જાત જાતની નાની - મોટીની બીમારીઓમાંથી મુક્તિ મેળવી ભાવવિભોર થઈ વિદાય થાય છે . મેળાના સ્થળે પોલીસ બંદોબસ્ત , ધાંધલ , ધમાલ , તોફાનો વગેરેનું તો નામ - નિશાન ન મળે . ચા - પાણી , નાસ્તો , જમણ , રાત્રિરોકાણ વગેરેની વ્યવસ્થા હોય જ . સ્વયંસેવકો તમામ પ્રકારની સેવાઓ માટે તત્પર હોય છે . ઝાડના છાંયડે બેસવું , આડે પડખે થવું , ગાદલાં , ખુરશીઓ , પંખા , લાઇટ , સંડાસ - બાથરૂમની ચોવીસ કલાક અવિરત સેવા માટે સેવાભાવી સેવકો હાજર હોય જ . મેળો યાને યાત્રાધામે બાધા - માનતા પરિપૂર્ણ થાય છે . આમ ખંભોળજનો મેળો એટલે જ બાળમેળો , ધાર્મિક , એકતાસભર મેળો , માનવમહેરામણનો મેળો , અનાથોની માનો મેળો પરિપૂર્ણ થાય છે , જ્યાં નડિયાદથી બસ મારફત જવાય છે , આણંદથી જવા માટે બસોની વ્યવસ્થા ઉપરાંત રિક્ષાઓ મેળાના સમય દરમ્યાન મળે છે . મેળાના સ્થળે ધાર્મિક ચીજવસ્તુઓનું વેચાણ અને નાસ્તા - પાણી માટે સ્ટોલ લાગેલા હોય છે . રોમન કેથોલિક સંપ્રદાયના ખંભોળજના મેળા ઉપરાંત વડોદરા ( નિરાધારોની માતા ) , મરિયમપુરા ( પેટલાદ ) આરોગ્ય માતાનો મેળો વગેરે મેળા ભરાય છે , જ્યાં ભક્તજનો ભક્તિભાવથી ભાગ લે છે .
टिप्पणियाँ
एक टिप्पणी भेजें